Kuri uyu wa 22 Gicurasi 2026, itsinda ry'abantu 261 baturutse mu Murenge wa Cyeru basuye Urwibutso rwa Jenoside yakorewe Abatutsi rwa Rebero, muri Kigali, ni mugihe iryaturutse mu Murenge wa Kinyababa rigizwe n'abantu 203 basuye Urwibutso rwa Jenoside yakorewe Abatutsi rwa Mukamira mu Karere ka Nyabihu.
Chief Editor 
Mu rwego rwo gukomeza kwimakaza ubumenyi ku mateka ya Jenoside yakorewe Abatutsi mu 1994 no guhangana n’ingengabitekerezo yayo, abagize amatsinda atandukanye basuye Inzibutso za Jenoside yakorewe Abatutsi mu Karere ka Burera basobanuriwe amateka yaranze Jenoside ndetse n’amateka yihariye y’izo nzibutso.
Muri uru ruzinduko, basobanuriwe uburyo Jenoside yateguwe ikanashyirwa mu bikorwa, ingaruka yagize ku Banyarwanda, ndetse n’akamaro ko kuzirikana amateka kugira ngo ibyabaye bitazongera kubaho ukundi.
Banahawe ibisobanuro ku mateka y’abazize Jenoside bashyinguwe muri izo nzibutso n’uburyo zazubatswe hagamijwe kubungabunga amateka no guha icyubahiro abazize Jenoside.
Abitabiriye uru ruzinduko kandi basabwe gukomeza kurwanya ingengabitekerezo ya Jenoside, kwirinda ibikorwa byo guhakana no gupfobya Jenoside yakorewe Abatutsi, ndetse no kugira uruhare mu kubaka ubumwe n’ubudaheranwa bw’Abanyarwanda.
Gusura Inzibutso za Jenoside yakorewe Abatutsi biri mu bikorwa biteganyijwe gukorwa n’Inzego zitandukanye ndetse n’ibyiciro binyuranye byo mu Karere ka Burera muri gahunda y’iminsi 100 yo Kwibuka32.
Iyi gahunda igamije gufasha abaturage n’abayitabira kurushaho gusobanukirwa amateka ya Jenoside yakorewe Abatutsi mu 1994, kuyigiraho no gukomeza urugendo rwo kubaka Igihugu gishingiye ku bumwe n’amahoro arambye.
Bagabo John
