Umuyobozi Nshingwabikorwa ushinzwe Itorero no guteza imbere Umuco, Uwacu Julienne, yabwiye Abarimu bigisha mu mashuri y’incuke, ko Umwana watojwe umuco w'amahoro awimakaza mu mikurire ye, ibi yabivuze ubwo yatangizaga amahugurwa y’abarimu bigisha mu mashuri y’incuke.
Chief Editor 
Muri aya mahugurwa, abarimu barongererwa ubumenyi ku buryo bwo kwinjiza mu masomo umuco w’amahoro n’indagagaciro bijyanye n’ikigero cy’abana, hagamijwe kubafasha gutegura Umunyarwanda w’ejo hazaza, ubereye u Rwanda nk’uko umugani w’Abanyarwanda uvuga ngo “Igiti kigororwa kikiri gito”.
Abarimu barasobanurirwa uko umuco w’amahoro n’indagaciro byongerewe mu ntenganyigisho ishingiye ku bushobozi (CBC), inyoborabarezi y’Ikinyarwanda no mu isaranganyamasomo; gutegura abarimu kumenya kwigisha binyuze mu mikino; no kwigisha abana bato amateka ya Jenoside yakorewe Abatutsi binyuze mu nkuru basomerwa zijyanye
n’ikigero cyabo.
Mu ijambo rye, Uwacu Julienne yibukije ko umwana watojwe umuco w’amahoro awimakaza mu mikurire ye, akarangwa no kubanira neza abandi, bigafasha Igihugu kugera ku iterambere rirambye ryubakiye ku bumwe n’ubufatanye, rizira umwiryane n’amacakubiri.
Biteganyijwe ko hazahugurwa abarimu 2.994 bo mu mashuri y’incuke ya Leta n’afashwa na Leta ku bw’amasezerano, bari mu byiciro bitanu bizasozwa ku wa 13 Ukuboza 2024.
Bagabo John
