Laurent Bucyibaruta, wahoze ari Perefe wa Gikongoro yakatiwe gufungwa imyaka 20 Kubera uruhare yagize muri Genocide yakorewe Abatutsi muri 1994. Ubushinjacyaha bwari buherutse kumusabira gufungwa burundu.
Chief Editor 
Hari hashize iminsi itanu Umushinjacyaha asabye urukiko kutazita k’ukuba Laurent Bucyibaruta agaragara nk’unaniwe ahubwo rukamukatira burundu kuko yagize uruhare ‘rutaziguye’ mu iyicwa ry’Abatutsi biciwe i Kaduha, i Kibeho n’i Murambi.
Bucyibaruta waburanaga ataha, kuri iyi nshuro urukiko rwategetse ko ahita ajya gufungwa. Yahawe iminsi 10 yo kujuririra umwanzuro w’urukiko.
Uyu mugabo w’imyaka 78 yari akurikiranywe n’ubutabera bw’u Bufaransa ku byaha bya Jenoside n’ibyibasiye inyokomuntu byakorewe muri Gikongoro yari ayoboye mu gihe cya Jenoside yakorewe Abatutsi.
Icyo gihe Ubushinjacyaha bwari bwasabye urukiko rwa rubanda rw’i Paris mu Bufaransa guhanisha Laurent Bucyibaruta igifungo cya burundu kubera uruhare yagize muri Jenoside yakorewe Abatutsi mu yahoze ari perefegitura ya Gikongoro yayoboraga mu 1994.
Guhana Bucyibaruta byafashwe nk’intambwe ikomeye ku butabera bw’u Bufaransa bwakunze gushyirwa mu majwi mu kuba indiri y’abasize bakoze Jenoside mu Rwanda, aho bidegembya ntacyo bikanga ndetse benshi muri bo bakaba badafatwa ngo bagezwe imbere y’ubutabera cyangwa abandi imanza zabo zigatinzwa bya hato na hato.
Bagabo John
