Guverinoma ya Tanzania yatangaje ko yababajwe n'inkuru yatangajwe ku wa 13 Nyakanga 2026 n'Ikigo cy'Itangazamakuru cy'u Bwongereza (BBC) binyuze muri gahunda ya BBC Africa Eye, ivuga ko ikubiyemo amakuru abogamye ku ruhande rumwe, adafite ibimenyetso bihagije, arimo ibura ry'amakuru y'ingenzi kandi agamije guharabika isura ya Tanzania ku rwego mpuzamahanga.
Chief Editor 
Mu itangazo ryashyizwe ahagaragara n'Ibiro by'Umuvugizi Mukuru wa Guverinoma, havugwa ko BBC itubahirije amahame y'umwuga w'itangazamakuru kuko itahaye Guverinoma umwanya wo gusubiza ku birego bikubiye muri iyo nkuru, nyamara Guverinoma yari yagaragaje ko yiteguye gutanga ubufatanye mu itegurwa ryayo.
Guverinoma yanavuze ko BBC yanze guha ijambo abayobozi babiri ba Guverinoma ndetse n'Umukuru w'Inteko Ishinga Amategeko ya Tanzania, ivuga ko ibyo bigaragaza icyuho gikomeye mu kubahiriza amahame y'itangazamakuru ku kinyamakuru gifite izina rikomeye ku rwego mpuzamahanga.
Nk'uko bikubiye muri iryo tangazo, Guverinoma yatangiye gukora isuzuma ryimbitse ku bikubiye muri iyo nkuru, kandi nyuma yo kurangiza iryo suzuma izafata ingamba zigamije kurinda ubwigenge, icyubahiro n'umutekano by'igihugu.
Umuvugizi wa Guverinoma ya Tanzania Gerson Msigwa
Yanatangaje ko izatanga ibisobanuro ku byo yise kuyobya abantu no gushishikariza ubushotoranyi byakozwe nkana muri iyo nkuru.
Guverinoma yasabye Abanya-Tanzania kwitondera amakuru n'impaka zishobora guteza impagarara zinyuze mu bitangazamakuru no ku mbuga nkoranyambaga.
Yanashimangiye ko izakomeza kubungabunga amahoro, ubumwe n'ubusabane bw'Abanya-Tanzania, no gushyira mu bikorwa ingamba zitandukanye zo guhangana n'ibibazo bya politiki, ubukungu n'imibereho myiza hagamijwe guteza imbere imibereho y'abaturage.
Bagabo John
